Вчера попладне додека со радост ја дознававме веста дека нашите сепак ќе стигнат до Пекинг, на самиот граничен премин бил застанат конвој од 18 кампери со германско потекло. Од колегијални причини и нашата вродена љубопитност, Шуклев и Николов веднаш ги размениле своите искуства  со нив и дознале дека се работи за проблем идентичен со нивниот.

И така гуглајќи и барајќи низ разни веб страни како Internations и незаменливата Wikipedia, како и агенции кои нудат разни совети и услуги се покажа дека се работи за многу посложена ситуација од колку што изгледа. Пред сè странската возачка дозвола, иако се толерира на некои места, не е признаена во Кина и возењето само со таква исправа се казнува со 14 дена затвор. Од 2003 наваму НР Кина се обидува до го спроведе законот за безбедност на сообраќајот на патиштата во своите 22 региони, со различен статус, од кои најмалиот брои нешто над 5 милиони жители а најголемиот над 100 милиони жители, додека останатите се движат меѓу овие две цифри. Тоа значи создавање на сообраќајна култура на еден куп луѓе со различни навики и отстранување на голем број нерегуларности. Да се рече дека сообраќајот во кинеските мегаградови е хаотичиен è најмалку што се може. Неправилности како поминување на црвено, навлегување во спротивната лента пред свртување, право на поминување- кој прв стигне, возење по средината на патот итн. се секојдневие. Да не заборавиме и на огромниот број на пешаци, велосипедисти и мотоциклисти кои се раководат по сопствената волја како и на сообраќајните знаци претежно со кинески карактери.

Фотографии од сообраќајот во Кина

Изградбата на нови патишта, за кои кинеската влада дава огромни средства е исто така причина за постојан прекин и застој во сообраќајот. Од друга страна пак, кинескиот автомобилски пазар è најголем на светот со по 17 милиони нови автомобили продадени во последниве години. Тоа значи дека мегаградовите како Пекинг и Шангај речиси секојдневно се будат во смог и гужва.

Гледајќи ги овие податоци и живеејќи на место каде е тешко да се создаде сообраќајна култура на помалку од 2 милиони луѓе и каде увозот на нови и половни возила ( кој во 2019 се движи во просек по 3500 возила месечно) веќе создава разни проблеми, заклучив дека за Шуклев и Николов се најде најдоброто решение. Тоа што на раат ќе ги разгледаат убавините на оваа земја по двенеделното патување низ непознатото им дојде како заслужен одмор. Ова се подразбира и за самото Renault 4 кои би сакале да го видиме повторно низ нашите улици отколку заглавено, можеби засекогаш, во хаотичнaта Кина. 

Автор В. Ѓоргиев        

Најнови фотографии од денешниот лет за Пекинг.

 ©Gevgelija.biz Крадењето авторски текстови е казниво со закон. Преземањето на авторски содржини од оваа страница НЕ е дозволено без согласност од тимот на Gevgelija.biz